Gjyqi historik ndaj Kadri Hazbiut

tiranaforum

Posted on 29/1/2010, 22:27 by: tiranaforum

User deleted

ARANIT ÇELA: Kalojmë në administrimin e provave...
LLAMBI PEÇINI: Kam një çështje në qofte se ka mundësi. Në seancën kur ju dha fjala të pandehurit Feçor Shehu, Mihallaq Ziçishti kërkoi fjalën dhe juve ja dhatë. Ai tha që unë dhe Llambi Ziçishti i paskemi thënë atij që Mehmet Shehu paska bërë takime në “Kuin Elisabet” me Titon dhe me Harri Fulcin. Unë kërkova fjalën për t’iu përgjigjur dhe për të pyetur. Nuk ma dhatë fjalën...
ARANIT ÇELA: Të thashë do të ta jap kur të duash, e kërkove tashti, ta dhashë...
LLAMBI PEÇINI: Ka mundësi të bej pyetje…
ARANIT ÇELA: Përse, ti e ke shpjeguar, ti nuk je dakord......
LLAMBI PEÇINI: Ti bëj pyetje, unë jo vetëm kam shpjeguar që s’jam dakord por s’kam biseduar fare unë me Mihallaq Ziçishtin. Unë do të bej një pyetje. Kur kam biseduar dhe çfarë shprehimisht i kam thënë...
MIHALLAQ ZIÇISHTI: Ma kanë shpjeguar, ma kanë biseduar konkretisht me ç’vapor kanë udhëtuar, që ishte Titua, për takimin me Fulcin dhe për të gjitha midis tyre ma ka shpjeguar edhe Llambi Peçini…
LLAMBI PEÇINI: Kjo është një gënjeshtër për arsye se Fu1ci nuk ka qenë fare në “Kuin Elisabet”, asnjë nga shoqëruesit nga grupi i shoqërimit as nga anëtarët e delegacionit...
ARANIT ÇELA: Kush ka qenë…
LLAMBI PEÇINI: Atje ka qenë Titua dhe i biri i Çurçillit, Randolf Çurçilli...
ARANIT ÇELA: Këta të dy kanë qenë...
LLAMBI PEÇINI: Këta të dy. Fulci s’ka qenë fare, nga e nxjerr Fulcin...
ARANIT ÇELA: Nga e di ti qe s’ka qenë Fulci...
LLAMBI PEÇINI: Po se dinim ne, prandaj një gjë që nuk e dinim si do t’ia thoshim Mihallaqit. Asnjë nga ne nuk e dinte. Unë nuk them që s’ka qenë Fulci, unë nuk them që s’ka takuar Mehmet Shehun me Titon dhe me Randolf Çurçillin, unë s’di gjë. Në praninë time dhe me dijeninë time s’është bërë asnjë gjë. Asnjë nga grupi nuk dinte që Harri Fulci ishte në “Kuin Elisabet”. Nga e nxori Harri Fulcin Mihallaq Ziçishti...
MIHALLAQ ZIÇISHTI: Nga juve...
LLAMBI PEÇINI: Gënjen. Pastaj pse nuk jam ballafaquar unë me këtë në hetuesi po ta kish thënë…
RRAPI MINO: Në hetuesi e ka thënë ai...
LLAMBI PEÇINI: Pse nuk jam ballafaquar unë ...
ARANIT ÇELA: Nuk janë bërë dhe ballafaqime të tjera atje...
LLAMBI PEÇINI: Ky ishte një moment i rëndësishëm...
ARIANIT ÇELA: Ja, ballafaqim është dhe ky...
LLAMBI PEÇINI: Kam dhe një pyetje tjetër. Ka biseduar gjë Mihallaq Ziçishti me Llambi Ziçishtin se me urdhër të Mehmet Shehut Llambi Peçini ka organizuar vrasjen e Sadik Premtes në Francë apo jo...
MIHALLAQ ZIÇISHTI: Jo...
LLAMBI PEÇINI: Atëherë të mbahet shënim, ju lutem, sepse Llambi Ziçishti e pretendon tek unë gënjen Llambi Ziçishti atëherë...
MIHALLAQ ZIÇISHTI: Edhe mundet të mos më bjeri ndërmend...
LLAMBI PEÇINI: A, e ktheve tashi...

ARANIT ÇELA: Fillojmë me administrimin e provave, të thirren dëshmitarët, të shqyrtohen dokumentet edhe atribuimet e të pandehurve që nuk bëjnë pjesë në këtë çështje këtu. Të thirret Fiqirete Shehu.

(foto e bere ne gjyq)

FIQIRETE SHEHU: urdhëroni...

ARANIT ÇELA: Ty të kemi thirrur tashi për të atribuar lidhur me çështjen që gjykohet dhe që i përket këtu të pandehurve, Mihallaq Ziçishti, Gani Kodra, Ali Çeno, Xhavit Ismailaga, Feçor Shehu, Llambi Peçini dhe Kadri Hazbiu, rreth akuzës të tradhtisë ndaj atdheut në formën e spiunazhit. Prandaj çka dini, d.m.th na i kallëzoni këtu, për gjëra që kanë të bëjnë lidhur me të pandehurit këtu, d.m.th me këta të pandehur. Juve këta të pandehur i njihni?...

FIQIRETE SHEHU: Lidhur me pyetjen që më bëhet unë mendoj të filloj me shpjegimet për të pandehurin Kadri Hazbiu lidhur me veprimtarinë armiqësore të tij ...
ARANIT ÇELA: Po...

FIQIRETE SHEHU: Kadri Hazbiu ka qenë ndihmësi më i vjetër, më i afërt, më i aftë dhe më i vendosur i Mehmet Shehut, i cili kryesonte organizatën tonë kundërrevolucionare, komplotiste e puçiste.
Ka qenë Dushan Mugosha, i cili ka qenë dërguar në qarkun e Vlorës nga Komiteti Qendror i PPSH për të punuar, duke u konsideruar një komunist internacionalist nga që partia në të cilën bënte pjesë ai ishte anëtar i Komitetit. Ndërsa në fakt si në Vlorë ashtu dhe në brigadën e parë, siç kam shpjeguar para trupit gjykues, në seanca gjyqësore kur u shqyrtua çështja ime, ai ka bërë një punë armiqësore të theksuar, duke tërhequr në shërbim të zbulimit jugosllav kuadro të ndryshme si në brigadë, siç shpjegova herën e kaluar në seancat e ndryshme hetimore e gjyqësore, ashtu edhe në Vlore. Një nga këta ka qenë Kadri Hazbiu.

Duke qenë i tillë, d.m.th qysh herët në veprimtarinë armiqësore Kadri Hazbiu ka punuar vendosmërisht në favor të organizatës sonë kundërrevolucionare dhe ka qenë ndihmës i afërt i Mehmet Shehut në gjithë përpjekjet për përmbysjen e rendit ekzistues socialist në Shqipëri... Për rrethanat në të cilat është tërhequr Kadri Hazbiu në veprimtarinë armiqësore në shërbim të zbulimit jugosllav në këtë rast, sikurse dhe për veprimtarinë armiqësore që ka kryer gjatë periudhës së luftës, unë kam dëgjuar nga persona të ndryshëm në kohë të ndryshme. Për herë të parë kam dëgjuar nga Liri Gega.

Me sa më kujtohet unë as e kisha dëgjuar emrin e Kadri Hazbiut më parë. Për herë të parë e kam dëgjuar nga Liri Gega, kur ndodheshim në Sllatinë të Peshkopisë ku zhvillohej një kurs politik me kuadrot politike të divizionit të parë sulmues. Aty Liri Gega më ka folur shpesh e shumë për Kadri Hazbiun, duke e paraqitur si një njeri për të cilin Dushani kishte simpati dhe një konsideratë të larte, duke e konsideruar si trim, të zgjuar, si mik të Jugosllavisë dhe si person me perspektivë për miqësinë dhe në favor të Jugosllavisë. Liri Gega më ka treguar gjithashtu se Dushan Mugosha i ka thënë që duke qenë i tillë, ti duhet ta mbash afër Kadri Hazbiun, të kesh besim për çdo gjë tek ai dhe ta mbështesësh.

Ajo nuk më doli hapur në pozicion armiqësor, as vetë, as edhe nuk më foli hapur për faktin që Kadri Hazbiu ishte tërhequr nga Dushan Mugosha në shërbim të zbulimit jugosllav. Por unë e kuptova fare qartë, duke ditur çështjen se si ai Dushan Mugosha kish vepruar me kuadro të ndryshme të brigadës së parë ku unë isha zëvendëskomisare, edhe me mua vetë që në këtë rast, Kadri Haziun e kishte tërhequr në shërbim të zbulimit jugosllav. Më vonë, kur u ktheva në brigadën e parë, unë gjeta aty që kish ardhur nga shtabi i divizionit Mehmet Shehu dhe e pyeta, a e njihte Kadri Hazbiun, meqë unë se kisha dëgjuar më përpara, edhe i thashë ç’më kish treguar Liri Gega. Mehmet Shehu më tha, se e njihte edhe ashtu qëndrojnë çështjet siç të ka shpjeguar Liria, më tha Mehmet Shehu. Edhe mua Dushani më ka folur kur ka qenë në brigadë në këtë drejtim e me këto terma për Kadri Hazbiun. Bile para se të largohej nga brigada më ka thënë që ki kujdes, d.m.th Kadriun. Ai është njeri i vendosur në këtë drejtim të miqësisë me Jugosllavinë, prandaj unë në çdo rast, edhe të kesh besim edhe ta mbështetesh edhe të mbështetesh tek ai Mehmet Shehu në një kohë të mëvonshme, konkretisht nuk më kujtohet, më ka folur edhe për atë çfarë i kishte treguar Kadri Hazbiu për periudhën në të cilën kishte qenë në Kosovë me brigadën e pestë sulmuese, të cilin partia e pati dërguar për të ndihmuar popullin kosovar në luftën çlirimtare.

Mehmet Shehu më tregoi në atë rast që Kadri Hazbiu vetë i kishte shpjeguar se si e kishte parë gjendjen në Kosovë, se si kosovarët kishin besim ndaj kuadrove dhe përgjithësisht partizanëve të brigadës së pestë që kish vajtur atje nga Shqipëria, ndërsa kishin mosbesim të theksuar te serbët, sikurse edhe te kuadrot shqiptarë të lidhur me serbët. M’u desh, i kishte treguar Kadri Hazbiu Mehmet Shehut që të bëja agjitacion dhe prapagandë në këtë drejtim, t’u shpjegoja kosovarëve që duhet të bashkëpunohet me këta serbët dhe me të tjerët nga kombësitë e tjera jugosllave, po sidomos me serbët dhe pas çlirimit, sidomos meqë Serbia është një shtet i zhvilluar, i përparuar, interesi i Kosovës është që të kërkojë të lidhet dhe të ketë vartësi me Serbinë për faktin se në këtë mënyrë mund të ndihmohet nga ana e Serbisë për t’u zhvilluar e për të prurë kulturë të përparuar më shpejt Kosova e populli kosovar. Gjithashtu më kujtohet se Mehmet Shehu më ka thënë se Kadri Hazbiu i kishte treguar që, meqë kish një mosbesim të tillë dhe raste veprimesh të kosovarëve kundër serbëve, kuadrot serbë dhe kuadrot kosovarë të lidhur ngushtë me serbët përdornin edhe masakra, vrisnin kosovarë me qëllim që të trembnin popullin e Kosovës, ta nënshtronin nëpërmjet frikës. Edhe në një rast të tillë, siç më ka treguar Mehmet Shehu kishte ndodhur, sipas shpjegimeve që i kish bërë Kadri Hazbiu, ishte ndodhur edhe vetë Kadri Hazbiu.

Për këto çështje pak a shumë me të njëjtat fjalë, mbaj mend se më ka folur një herë që bisedonim për ngjarjet e Luftës Nacionalçlirimtare edhe i pandehuri Mihallaq Ziçishti, i cili më tha se Kadri Hazbiu i kishte treguar veç të tjerave edhe, një fakt të tillë që duke qenë gjendja e tillë në popullin e Kosovës me një mosbesim të theksuar ndaj serbëve përgjithësisht, nuk do ta ketë të lehtë Dushan Mugosha e të tjerët që t’i nënshtrojnë me të butë, por do të përdorin forcën, dhunën kundër tyre. Ndërsa në një rast tjetër, menjëherë pas çlirimit, kur unë punoja si përgjegjëse e sektorit teorik në drejtorinë e agjitacionit e të propagandës të Komitetit Qendror që varej nga Nako Spiru, Nako Spiru një ditë i nervozuar me duar prapa ecte nëpër zyrë e shfrynte kundër Koci Xoxes, megjithëse ishin të të njëjtit shërbim, në shërbim të zbulimit jugosllav, se ai Koci Xoxe thoshte Nakua, i ka zgjidhur mirë punët e tij, ka marrë kuadro të zgjedhur dhe besnikë të tij si këtu në sektorët e Komitetit Qendror që drejton ashtu edhe në Ministrinë e Brendshme, në organet e brendshme përgjithësisht, ndërsa mua më ka lënë bosh me kuadro.

E një kuadër i tillë thoshte Nako Spiru, është Kadri Hazbiu, të cilin Koci Xoxe se ka pas njohur sepse Kadri Hazbiu ka punuar në Vlorë dhe pastaj në brigadën e pestë, kurse Koci Xoxe në Korçë porse ja rekomandoi Velimir Stojniçi dhe Dizdari, të cilëve ua kish rekomanduar Dushan Mugosha që e njihte. Dua të them që kur Liri Gega, duke u kthyer pak më pas në kohë, më foli për Kadri Hazbiun dhe për lidhjet midis Dushan Mugoshës e Kadri Hazbiut më tha, se kur Dushani ishte në Vlorë, kur ishte dhe ajo, vinim shpesh në Hysoverdhë në shtëpinë e Kadri Hazbiut dhe atje i kish bërë këto biseda sikurse dhe gjatë rrugës që e shoqëronte Kadri Hazbiu Dushanin në lëvizjet e tija nga fshati në fshat e të tjera, megjithëse ai bënte lëvizje më të pakta se sa unë, thoshte Liri Gega. Në këto rrethana kam dëgjuar unë për lidhjet e Kadri Hazbiut me Dushan Mugoshën dhe për veprimtarinë e tij në këtë periudhë...

ARANIT ÇELA: Po pas çlirimit, cili ka qenë qëndrimi i tij?
FIQIRETE SHEHU: Periudhën pas çlirimit, periudhën e aktivitetit të Kadriut unë e ndaj në dy faza. Faza e parë, nga tërheqja në organet e Punëve të Brendshme kur ishte Koçi Xoxe ministër deri në Plenumin e 11-të të Komitetit Qendror të shtatorit 1948, ku Koçi Xoxe u dënua dhe periudha tjetër nga Plenumi 11-të, më mirë nga Kongresi i Parë i Partisë dhe deri në Konferencën e Partisë së Tiranës, që u zhvillua më 1956 në prag të Kongresit të tretë të PPSH.......
ARANIT ÇELA: Tashti të fillojmë me fazën e parë...
FIQIRETE SHEHU: Në fazën e parë në kohën që në krye të Ministrisë së Brendshme ishte Koçi Xoxe, Kadri Hazbiu ka kryer disa detyra armiqësore të rënda. Në radhë të parë Kadri Hazbiu në këtë periudhë ishte ngarkuar si dhe kuadro të tjerë, ndër të cilët edhe Mihallaq Ziçishti, që të grumbullonte të dhëna të trilluara për kundër sekretarit të Parë të KQ së partisë, sekretarit të Përgjithshëm që quhej atëherë, me qëllim që Koçi Xoxe t’i përdorte ato për ta goditur atë e për të marrë drejtimin e partisë ai vetë.
ARANIT ÇELA: Tjetër...
FIQIRETE SHEHU: Drejtim tjetër ishte puna për të ngritur autoritetin dhe rolin e Koçi Xoxes në parti e në vend, duke arritur gjer aty, që në mbledhje të ndryshme të porositeshin njerëzit që të hidhnin dhe parulla pro Koçi Xoxes, të shkruanin edhe parulla të tilla me qëllim që të përgatitej opinioni, që kur të vinte momenti, i pari në drejtim të partisë, mbasi të eliminohej sekretari i Përgjithshëm, udhëheqësi i partisë të ishte Koçi Xoxe... Moment tjetër i veprimtarisë armiqësore të Kadri Hazbiut është ai pas dënimit të Koçi Xoxes deri në Konferencën e Partisë së Tiranës. Mehmet Shehu e ruajti Kadriun dhe i kishte thënë që mendonte bile, që ta marrte në Ministrinë e Brendshme. Në fakt, Mehmet Shehu e paraqiti te sekretari i Përgjithshëm për t’u bërë zëvendës, me sa mbaj mend unë zëvendës i parë i ministrit të Punëve të Brendshme Kadri Hazbiun dhe kështu u bë në fakt. Kadri Hazbiu jo vetëm nuk u dënua, por u ngrit në përgjegjësi dhe u bë personi i dytë në Ministrinë e Brendshme menjëherë pas Mehmet Shehut. Kjo taktikë e ruajtjes së forcave u ndoq dhe për kuadro të tjera që kishin punuar nën vartësinë direkte të Koçi Xoxes e në shërbim të zbulimit jugosllav...
ARANIT ÇELA: Po me kuadrot e tjerë çfarë u bë...
FIQIRETE SHEHU: Mehmet Shehu kish lënë porosinë si Kadri Hazbiut gjithashtu dhe Mihallaq Ziçishtit që të kishin kujdes që të ruanin kuadrot e vjetra, edhe ata që ishin larguar nga Ministria e Brendshme, t’i mbajnë afër për t’i përdorur në rastin e volitshëm.
ARANIT ÇELA: Kush ishte ky rast i volitshëm...
FIQIRETE SHEHU: Rast i volitshëm u quajt Konferenca e Partisë e Tiranës e vitit 1956, që do të zhvillohej në prag të Kongresit të Tretë të partisë. Situata politike, pa u zgjatur, sfondi politik në të cilën u zhvillua ajo qe i tillë që, pas vajtjes se Hrushovit në Beograd për t’iu nënshtruar Titos për të rehabilituar revizionizmin jugosllav, pas Kongresit të 20-të të Partisë Komuniste revizioniste të BS, të gjitha vendet ish-socialiste, duke filluar nga BS dhe vendet e tjera me përjashtim të Shqipërisë, hynë si të thuash në garë kush e kush të afrohej më shpejt Jugosllavisë, të rehabilitonte agjenturat e saj që kishin dënuar si Trajçe Kostovin në Bullgari, Rajkun në Hungari, etj. Veç në Shqipëri nuk kishte ndërruar aspak kursi.

Prandaj armiqtë ruajtën momentin e organizimit të Konferencës së Tiranës dhe qysh më parë ndërmorën një punë të gjerë armiqësore për të vënë në lëvizje të gjithë grupet e personat në shërbim të tyre. Në këtë kuadër u vunë në lëvizjen tonë komplotistë e puçistë që drejtoheshin nga Mehmet Shehu, sikurse dhe grupe të tjerë që lidheshin me agjentura të ndryshme. Para Konferencës së Tiranës, unë mora kontaktin e parë pas çlirimit me një person në shërbim të agjenturës jugosllave dhe që është i pandehur këtu, Feçor Shehun, i cili më vuri në dijeni për këtë çështje në linjën jugosllave, pavarësisht që në linjë tjetër Mehmet Shehu, nga ana e sovjetikëve ishte vënë gjithashtu në lëvizje për të organizuar punën armiqësore në konferencë. Qëllimi i veprimtarisë armiqësore që do zhvillohej aty ishte i atillë që, të goditej vija e partisë, udhëheqja e saj, të kthehej vija marksiste-leniniste në një vijë revizioniste, të përgatitej terreni në konferencë me qëllim që në Kongresin e Tretë të Partisë, që do të zhvillohej pas ca kohe, se Konferenca e Partisë u zhvillua në prag të Kongresit të Tretë të partisë, të goditej vija e përgjithshme e partisë dhe të ndodhte në kongres ajo që ndodhi në Kongresin e 20-të. Të ishte si të thuash një Kongres i 20-të në miniaturë. Pikërisht mbi bazën e Platformës së Kongresit të 20-të do të zhvillohej edhe Konferenca e Tiranës, sipas punës armiqësore të organizuar nga grupi ynë armiqësor që kryesohej nga Mehmet Shehu.

Në përgatitje të Konferencës një rol të veçantë ka luajtur Kadri Hazbiu, i cili ishte ministër i Brendshëm dhe që kishte fijet në dorë si në rrugë legale, d.m.th., të të gjithë aktiviteteve që zhvilloheshin, ashtu edhe nëpërmjet lidhjeve agjenturore që ai mbante nga një anë me Svetozar Koçiçin, me zbuluesin jugosllav, me legatën jugosllave që ishte qendra e organizimit të punës nëpërmjet nesh, po ashtu edhe me Mihallaq Ziçishtin dhe me Feçor Shehun. Për këtë rol të veçantë të Kadri Hazbiut në organizimin e punës në Konferencën e Tiranës në të tre fazat, si para Konferencës për përgatitjen e punës armiqësore, gjithashtu edhe gjatë e pastaj pas Konferencës, mua më ka folur Mehmet Shehu. Në prag të Konferencës së Tiranës, Feçor Shehu erdhi i dërguar nga Svetozar Koçiçi tek unë dhe këtu unë mora takimin e parë me një person të agjenturës në shërbim, d.m.th., të agjenturës jugosllave pas çlirimit. Kur më vuri në dijeni, siç do të shpjegoj më poshtë Feçor Shehu për punën që përgatitej për të zhvilluar në Konferencën e Tiranës, unë u tremba u frikësova meqë isha sekretare e parë e KP të Tiranës.

Prandaj kur shkova në shtëpi, i thashë Mehmet Shehut që kështu ka ardhur Feçori dhe kjo mua më shqetëson se unë jam sekretare e parë. Mehmet Shehu u mundua të më qetësojë dhe më tha mos ki aspak frikë për këtë çështje sepse i deleguar i KQ do të jetë Beqir Balluku, që është në pozitat tona dhe është i hershem në lidhje me zbulimin jugosllav. Ndërsa fijet e gjithë punës që do zhvillohet në konferencë, i ka Kadri Hazbiu, i cili është në lidhje, duke qëndruar vetë në prapaskenë me zbulimin jugosllav, me Svetozar Koçiçin sikurse dhe mban lidhje me Mihallaq Ziçishtin dhe me Feçor Shehun, të cilët do të jenë brenda në konferencë, aq më shumë që ty të është ngarkuar një detyrë, si rol pasiv, meqë je sekretare e parë e Tiranës dhe gruaja ime, më tha Mehmet Shehu. Me këtë rast unë more vesh për veprimtarinë që do zhvillonte Kadri Hazbiu në konferencë.

ARANIT ÇELA: Filloi konferenca e partisë...
FIQIRETE SHEHU: Pas raportit që mbajta unë si sekretare e parë filluan nga të gjitha anët pyetje të gjithanshme kundër vijës së partisë, kundër udhëheqjes së partisë, duke u bërë pyetje edhe në drejtimin tim edhe te Mehmet Shehut, gjë që mua më tronditi në fakt dhe në një nga pushimet, duke qenë e mërzitur dhe pak e mënjanuar në kohën që Beqir Balluku bisedonte me delegatë të tjerë, m’u afrua Feçor Shehu e më tha, pse qëndron kështu e mërzitur dhe e mënjanuar. I thashë, nuk e dëgjove seç u tha në konferencë për mua. Ç’pyetje u bënë dhe për Mehmet Shehun? Feçor Shehu tha, që të tilla pyetje dhe do bëhen se dhe kjo bëhet me qëllim që të mos bjeri dyshimi mbi ty e mbi Mehmet Shehun. Megjithatë, filluan diskutimet, të cilat i kapërcyen edhe caqet që ishin caktuar, d.m.th nuk u kufizuan veten te goditja në mënyrë të kamufluar e vijës së partisë, por u bënë dhe diskutime më të hapura, duke u kërkuar lidhje miqësie me Jugosllavinë në bazë të Platformës së Kongresit 20-të të BS, etj.
ARANIT ÇELA: Po për revizionizmin kinez...
FIQIRETE SHEHU: Në kohën që doli revizionizmi kinez Kadri Hazbiu shprehu pikëpamjen që, tani ne mbetëm krejt vetëm si vend, megjithatë ndoshta edhe më mirë do të jetë për vendin tonë se Kina është shumë larg, duhen tre muaj duheshin që të vinte e të kthehej vapori për të sjellë ndonjë ndihmë, kurse tani ne na intereson të lidhemi më ngushtë dhe ato marrëdhënie që kishim në fushën e tregtisë e të tjera t’i shtojmë me Jugosllavinë, sidomos dhe me Çekosllovakinë, me vende që janë edhe më fqinjë edhe që kanë teknike e teknologji më të përparuar. Kjo është periudha ‘77-‘78 nuk e mbaj mend ekzakt se kur. Lidhur me Kadri Hazbinë kam dhe një moment tjetër për të cilin mund të flas. Tjetër qëndrim armiqësor i Kadri Hazbiut në shërbim të agjenturave të huaja ka qenë qëndrimi i tij lidhur me fejesën e djalit tonë Skënderit. Vajtja te sekretari i Parë i Komitetit Qendror për të informuar për përbërjen e familjes së Qazim Turdiut, që ishte me përbërje të keqe armiqësore dhe pastaj gjithë qëndrimi i Kadri Hazbiut që nga shtatori 1981 deri më 17 dhjetor 1981 kur Mehmet Shehu vrau veten. Këto veprime si vajtjen te sekretari i Parë i Komitetit Qendror ashtu dhe gjithë veprimet e mëvonshme që shtrihen deri më 17 dhjetor Kadri Hazbiu i ka bërë jo me kokë të tij. Përsa i përket vajtjes te sekretari i Parë në shtator, kur ai kish marrë vesh gjoja për herë të parë për këtë çështje, Kadri Hazbiu meqë ishte Mehmet Shehu në Tiranë ishte konsultuar me ambasadën jugosllave dhe ajo e porositi, zbuluesi jugosllav, që të vinte ai vetë ta thoshte që të paktën të shpëtohej Kadri Hazbiu në këtë rast dhe të forconte ai pozitat e tij. Ndërsa gjithë veprimi tjetër që u bë që nga shtatori dhe deri më 17 dhjetor u bë duke u koordinuar, duke përpunuar një vijë sjellje Kadri Hazbiut ndaj Mehmet Shehut, duke u mbajtur një qëndrim i dyfishtë dhe për këtë vijësjellje e për këtë qëndrim të Kadri Hazbiut qenë informuar edhe të dy agjenturat, sovjetike dhe jugosllave, të cilat e kishin aprovuar, sidomos jugosllavja që i kishte thënë se duhet në këtë situatë Kadri Hazbiu ta godiste rëndë Mehmet Shehun. Po të jetë e nevojshme e shpjegoj më gjatë këtë...

Edited by tiranaforum - 30/1/2010, 17:08

69 replies since 28/1/2010, 22:35 12497 views